martedì 6 dicembre 2011

Eniuei (onli for padovan spikers)

A ve dirò un segreto. Paso così tanto tempo da soeo, che go scominsià a parlare tra mi e mi in diaeto, che così me a paso via e me pare de stare casa.
Tanto no ghe ze tanta diferensa. Sti qua, che te parli inglis o queo che te voi, ni capise un'ostrega e ora almanco me diverto un fià.
A dire ea verità, sta idea me a ga dà me fradeo, che eo ze bituà parlare coi indigeni in diaeto.
Soeo che eo eo capisse eo stesso, ma no so mia se ga provà co sti qua dee tribù.

A so sta in giro pa ste tribù, che mi me pare tute uguai.
I vive nee capane in mezo ai monti, coi poastri, e oche, e i porsei. Qualche volta go visto che i tien i porsei soto ea capana, se vede che i ga paura che ghe scampa, ma chissà che spusa de merda che i gavarà in casa.
A voio dire, i bocie me pare bituà, i zoga in mezo al merdon tuto el tempo, e tante volte co rivo i vien domandarme e penne, come in africa.
Te dirò che i no pare gnanca tanto contenti, qua in laos.
Ghe ze qualcuno che te soride ma tanti i se fa i cassi sui e serti non te risponde gnanca se te i saudi.
Serti i pare cossi immusonà, che se te ghe disi muso da can te ghe soeo che dito ea verità.

Eniuei (come che i dise sti bechpechers, quei che va in giro col zaino sue spae), qua ze pien de bocie. No go capio se ze parché ni ga un casso da fare co riva sera, se ze parché ni ga educasion, o parché i goldoni costa masa.
A go pensà che saria un bel bisness, vendare goldoni a sti qua dee tribù, ma come casso ghe spiego come che i funsiona ?

Eniuei, a pareva che da ste parti e femane dovesse tute saltarme dosso e invese... col casso!
A me so domandà anca parché, go dito:
Sarà el zaino che spusa da freschin ?
Sarà e braghe onte de merdon ?
Mah...

I me ga dito che qua in asia ze e done che lavora e i omani che varda. Efetivamente no me pare che i se spaca ea schina, qualche volta ne go visto uno ndare in giro co eo sciopo, ma pi che altro i mena vanti en drio i motorei.
Saria gnanca mae, soeo che bisogna catarghene una. E se sposa a 22 ani, così che prima e ze masa zovani e dopo e ze zà sposà.
Ne go catà una che me rompe i cojoni tuti i giorni che ea voe vegnare in Iurop, che ea pensa de fare schei e bea vita.
Ghe go dito: intanto te me a cai e poi vedaremo.
O che no a ga capio o che ga fato finta de ninte, podì imaginare come che a ze finia, a me toca diventare santo par forsa.

Ea setimana pasà ne go catà una che iera drio spetare il tragheto come mi e gaveva do gambe bee in mostra che i oci no iera piu boni de stacarsene. Così so ndà la direto e ghe go dito "da dove viento" e go tacà discorso insoma.
Ea vardavo drito in chei oci e sta qua me vardava e sorideva, a go dito "qua me buta proprio ben, desso ea ciapo e mea ciavo drio el banano".

No a ga mia tacà a parlarme del so boifrend ? Che a ze finia ma che intanto ea mena in giro pal mondo e vanti.
A go pensà "a sarà anca bea ma sta qua ze una che ciucia schei e anca se lamenta". Mi non vojo mia giudicare ma me nona buonanima gavaria dito "e femane ze tute putane".

Eniuei ze rivà ora de montare in tragheto e el boifrend ea ga ciamà e ea a me fà "vien anca ti" e mi son dà drio. A un serto punto go visto el boifrend: na via de mezo tra tarzan e Diego Abbatantuono in attila il fratello di Dio, alto, grosso, pien de muscoi, coi cavei longhi e i calsetti bianchi e e zavate.
A go dito "Speta, speta che mea moco, che se sto qua ghe e gira dopo i ghe toca catarme i tochi col reastreo".

A pareva anca che qua fosse tuto cip, come che dise i bechpechers, e invese go da stare tento.
Ze anca vero che te ghe un bel servisio pai schei che te paghi, se magna ben, ze caldin, i monti ze bei da vedare e dopo me togo na bicicleta e vago farme un gireto in mezo ea natura.

Eniuei, a tuti quei che me domanda schei o fac-simile, mi i mando tuti in figa de so mare. No so mia un'organisasion de beneficiensa. Coe tose so un fià pi delicato parché no ze polait (come che i dise i bechpechers, anca se sta paroea mi me pare na marca de dentifricio). Poi sti bechpechers me fa sempre "iu nou" e mi ghe digo: iu nou cossa ? Se te me disi, mi nou, se no mi no nou un casso e ora te poi anca ndare...
A so poeta e anca polait.

Eniuei, podì vedare come che so diventà poliglota (che no so se savì cossa che vol dire, vol dire uno che parla un mucio de lingue, ma varda se te voi vedare che sciensiato che so diventà), così me scusaré se ogni tanto fasso confusion coe paroe.

Co ea anda ghe go me sa che ea prosima volta se sentimo par Nadae. A spero de saudarve da qualche bea spiaja in bea compagnia.
Ah! No fasì masa sforsi par vegner catarme, so che se sta ben al fredo e in mezo al trafico e al nebion... divertive!
Eniuei... tuto ben. Bazeti e strucoti.

1 commento:

  1. Accidenti...vuoi vedere che faccio più fatica a leggere in dialetto che in inglese??? Grazie Nic per il ripasso ;-) Devo dire che il dialetto sembra la lingua più appropriata per questo tipo di humor...si recita a soggetto eh?

    Per il controllo delle nascite??? Vai con la dimostrazione pratica...alla Monty Python (non so se hai presente la scena di educazione sessuale ne "Il senso della vita" http://www.youtube.com/watch?v=6p9RNlIg3q4) Potresti farti assumere da qualche ben nota marca ;-) Altro che inglese, informatica & Co...

    Bazeti e strucoti!!!
    Silvia

    RispondiElimina