Grassie Gesù bambino

Par na volta a vojo essare bon, e par Nadae go deciso de farve un regaeo.

Imaginè de ver vinto en viajo premio, en tichet par uno de quei parchi divertimenti, Gardaland o queo che ve piase de pi.
Col tichet, ghe ze anca il fri pic ap, come che dize i bechpechers, che voe dire che i vien anca torve casa. Ve dà da magnare e tuto quanto, gavì soeo che goderve ea vacansa.
Ze na bea roba o no ?
E unica roba ze che no savì quando che i vien torve par menarve casa.

Sio pronti ?
E ora il regaeo ze che il tichet e o gavì zà ciapà, ve o ga dà in man dopo quei 5 minuti che to pare se ga dà fare e to mama se restà in stato interesante, come che se dize.
Là i ze vegnù torte dove che te ieri, tra i angioeti o no so dove e i te ga menà qua dove che te sì desso.

Te podarissi dirme che no ghe ze tanto da divertirse, coa crisi e cassade varie. E ora mi te digo che se te te diverti o no ze soeo che cassi tui. Vojo dire, se te pensi che divertirse sia magnare, bere, ciavare e no fare un casso no the ghè capio un'ostrega.
Quando che te vè al cinema, e te vardi un film oror, o dramatico, te divertito ?
Cossa ghe ze da divatirse ?

A me ricordo co so ndà coa morosa vecia a vedare titanic, co tuta ea gente che more, ea ga pianto pa un'ora o do e aea fine ga dito "beo ciò".
A me vegnaria da dire "a te sito fulminà el cerveo ? Te pianzi pa un'ora e te disi che ze beo ?" Eh... Ze emosion.

Ma co te tocà ti ciaparla in cesto no te disi mia "beo ciò".
Il fato ze che te pensi de vere qualcossa. To mojere, to fioi, el to lavoro, to schei, el to cafetin, ea to idea e se no te ghe ninte de pare de no vere un casso.
Il fato ze che no te ghè un casso.
Stampatea in testa sta roba: no te ghè un casso.
Tuto queo che te pare de vere ze in prestito, tuto va e vien, no te poi tegnere ninte.

Te disi tanto dei poitici, che ze tacai al segiolon ma ti te si compagno. Te si tacà coe ongie e coi denti a queo che te ghè, a queo che te piaze, a queo che te pensi e se te capita qualcosa de diverso te pare de morire.
E anca se te mori ?
Prima o poi me toca tuti, e cossa ze che sucede ? Ze soltanto un tornare casa, coi angioeti o queo che sarà. Par cui sta quieto, no sta lamentarte.
Te vedi el soriso de na bea toseta ? Anca se te va ben, no ze tuo. Vardeo, dì grassie e tira vanti.
Te eo ga ciapà in cesto naltra volta ? Desso te fa mae, ma dopo te passa. Tasi, porta casa ea lesion e tira vanti.
No sta tacarte co ninte, tuto poe essare beo o utie, ma tuto riva e passa.

Te ghe vinto sto tichet, te ghè sto parco divertimenti, goditeo, varda cossa che ghe ze, impara come che funsiona.
Te ga messo a recitare dentro un film e te ga dito "fa quel casso che te voi". Divertate. Osa. Tote un rishcio. Vivi ben queo che te capita.



Eniuei ea prima volta che so ndà a Gardaland qualche mona me ga dito "dai che ndemo sue montagne russe". "Ma sito sicuro ?" ghe go dito. E staltro "Va ponà."
E so ndà cosi ponà che dopo go spantassà anca el paneton de l'ano prima e so stà mae tuto el giorno.
Ea seconda volta so ndà tuto el tempo drio e tosete e no me so divertio un casso.
Ea tersa volta go dito "Co tuti i schei che spendo par vegnar qua a vojo anca vedare ben come che funsiona" e go provà tute e giostre, do volte que che me piazeva, go fato el mona e finalmente go vudo sodisfasion. Go dito "no ze gnanca tuta sta merda sto gardaland".

Cossì go scrito na letera a Gesù bambino par ringrasiarlo del tichet.
Caro Gesù bambino, grassie.
Grassie a ti e ai to compari che ze vegnui torme dove che iero e me ga menà qua. I me ga dito che quea volta ghe ze stà un fià da combatare ma aea fine ghe a ghemo fata, e manco mae.
Grassie par tuto queo che te me ghe dà, da magnare, da dormire, educasion e compagnia bea. Vojo dire, ea lista saria longa ma se vede che te fato un bel lavoro parché co me vardo a eo specio dopo na docia digo sempre "ma varda se te voi vedare, varda che bel toso".
Grassie par tute e volte che a go ciapà in cesto parché ze là che go capio e go imparà ea major parte dee robe, e sopratuto go catà ea motivasion par cambiar e vegnare cercarte seriamente, che ze stà ea mejo mossa de tute.
Grassie par tute e volte che me so roto i cojoni, parché go capio che tuto passa e lamentarse non serve a un'ostrega, ansi e te me ghe nsegnà a vedare tuta ea bea roba che Papà ga meso in giro.
E dighe grassie a Papà de tuta sta bea roba che ogni tanto me vien da pianzere da quanto bea che a ze. De sto cieo blu, dei tramonti, dei sorisi dee bee tosete e dei putei, dea natura co sti boschi verdi e i fiumi, e ste cascate che pare che spaca tuto.
Grassie par i animai, ea fruta e verdure e el magnare, che no ghe ze verso da vedarli tuti parché ne cato sempre de novi.
Grassie dea musica e de tute e arti dei omani, dea lunghissima lista de quei che ze vegnui darme na man co no savevo come ndarghene fora.
Grassie par tute e volte che go paura e ti te me dè corajo, così ghe provo e aea fine ghea fasso in stesso.
Grassie par tute e persone che me voe ben, e par quei che me ne ga vossù par ea longa strada che ga menà fin qua.
Grassie parché te me assi libero de essare queo che so', parchè te me insegni a essare queo che so'.
Grassie par sto tichet, ghe go messo na vita ma me pare d'aver scominscià godermeo.



Gesù bambino, voria domandarte na roba.
Co te vien torme par ndare casa, se ghemo da ciapare eo sliping bus, queo che se dorme de note, a podaria, se ze posibie, vere un posto singoeo ?
No, parché l'ultima volta te me ghe meso neo steso posto un russo grosso come queo de Rocky, e ghevimo un metro in do, eo ze sta gentie par carità ma insoma.
Co me giravo da na parte me pareva de bazarlo in boca, co me giravo da staltra me pareva de ciaparlo in cueo... tasi che a ea fine ea ga capia e se ga girà da ea parte giusta.
Capissito cossa vojo dire ? Tanto ze gratis, no ?

Grassie Gesù bambino!

Buon Natale! Sia Luce negli occhi e nei cuori!